محمد العلوي الباهي
مُوسم تقطير الزهر فْتازة بْريحتو كْساني
يجعل ربي البركة فحبيبي حميد السليماني
لَفضل يرجعْ ليهْ حيتْ بْلعطر سْقاني
بْحثْ فْتراث تازة على الاصالة وْ بها دَواني
حْيَى مُوسم التقطير وْ زْرع فيه الروح تاني
الورد فْمڭونة وْ مْع راسي قلتْ آش دَّاني
حيتْ الزهرْ عندنا فُوسْط الديور و السْواني
الزهر فَالشْوارع مْنوّر خُذ ليك وْ ليا وْ لْبراني
فصل التقطير فَالربيع لْدار السماع رْماني
البرمة بَلبزبوزوَ المجمرْ وَ الرابوزْ وَ الفاخرْ حِيّاني
قطرة تابعة قطرة حتى عمرُو لَقراعي وْ لَعْيا ما جاني
كاسْ اتايْ مْنسّم وْ روح الزهر هي مْڭَوْداني
وْ مسْكْ الليل فايحْ فَدْروبْ المدينة يَرْعاني
الطربْ الاندلسي نغْمَةْ لُوتار حْلوّة فَوْداني
شعارْ المُوسم بْهَرني وْ حَسّيتْ بْقلبي حَداني
سيدي حميد تازة مْقدْراكْ سْمعْ لْغايا وَ رْواني
سجّلتِ اسْمك فْتاريخ مْدينة عْريقة ماشي الرّمّاني
يْجازيكْ الكْريم المَنّان فِينْمّا راكْ وْ راني
