هذه القصيدة مهدية لكل سكان جرسيف ومحبي الشعر الملحون و القصيدة الزجلية الموزونة


IMG-20180624-WA0002

بلخياطي الجرسيفي الادريسي

دخلتـي لگـرسيف ماكملـشي العـــام *** راه زينـك في گـراسفـة دايــر لعجــب
يــوم شفتـك ما حســـبتـك بـنـت آدام *** حـوريـة عـذراء من الجنـة تتــوهــب
حتى گالو تازية السكنى بيـــت غــلام*** جا ت تقيم فگرسيـف عجبها مضــرب
ذا گال جبليــة بنت مـولاي بـوسلهــام *** هذاك ظـنـهــا جايـة من حـوز الغـرب
ولا ذي بنـت فاس بيض مثـــل رخـام*** سيدي حرازم دايما مائها في الشــرب
و للا بيضاوية الـزيـن ثـم كـل تــــلام*** الدكالي و العبـدي المـلالـي و مـزاب
ذا گال من الأطلس كيوتيـها لوشـــام*** وللا صحراوية غزال من واد الذهــب
هذا گال وجدية خصها حايـك ولثـام*** وللا سوسية في خطواتها لبـدا تـــزرب
رديت عليهم گــلت ليهم في الختـــام*** المغربــيـة أنا عشقـتـهـا ما ديـر ذنــب
لكن القانون جديد زير فــي لحكــام*** و شيخكم راه محصون ما هــو عـزب
حتى هـي واش آنســة و للا مـــدام*** جـاوبـت كيف سألت بكــلام مصــوب
گالت لي يالشيـــخ قــلبـي ذو لـيــام*** العشــق للـي جابـو لگرسيف مغــرب
المغرب كله اهلـــك ما فـيـه قـســام*** گلـتلها حباب ونساب مـازيغـي و عرب
ودعتها بالحزن علي قـلبــي بكــوام*** يا فـرح للـي دارها فـي جـنـبـو قــرب
لطاي عندها غـزال ما رسمـه رسـام*** الرقبة طويلة جـابـت الـقــد منـاســب
وجهها كالبدر في ليلة كمــالو بـتمـام*** و شفايف كالكـيسان يلـيـقو للـــشـرب
لحواجب نونين والعــيـن يا ســـــلام*** مـدفع جــندي حامله في يـوم الحرب
النظرة منهم نار تحـرق في العظـام*** شيخ و شباب بنارهــم راه تــلـهــب
الجبيــن المبشـور و الضحكـة تبسـام*** لسانــها ينطق غيـر بالعــلـم و الأدب
الصـدر معمر فــيه نبـــت زوج تـــوام*** طابوا حـتى حـلـيبـهـم ولـــى رايـــب
المسقي منهم راه يبـرى مـن لسقـام*** و المحروم مسكين بالمرض تخــــرب
السـاق معمر و الحلاوة فـي لـقــدام*** غزال الصحرى في رمالي كيـلعـــب
زينـهـا مكمول طابعتـه فـي الحــزام*** اللــه خلقــها ما عندها شي يتعـيــــب
جمالها يبهـر بيـه فاقت عـلى لـريـام*** مكيـن شـي زوج مـثلها راه نـــــجــب
مزال بها في النوم نحلـم في المنــام*** بعد سنين عــداو من عـمـري تايــــب
القلب يعزها معه راني فـي الخصـام*** الناظم خوكم راه فــي الفكر مـعـذب
قلبه الفنان رهيف حســـاس بالگـرام*** المغـني والملحن العـازف و الـكاتــب
ناس الفن مرهـفين حتى في لحـلام*** عندهم قلب حساس بكـلمة يتعـطـــب
عبــد الهادي زمان غـنى في لنــغـام*** بلخيـاط طبيب و جـرحو مـا له طــب
عبد الوهاب عـي بصبره عــاد رمـام*** الدكـالي مرسول حبـو مــشـى غـيــب
لمغاري تلقاه في الصحـوى و غيـام*** عـنـد رجال اللـــه مفـتاحـــو طالــب
الحياني غـنى راحلة ورحل بـــدوام*** المـرحــوم خـلا محبتو فـي كـل قـلـب
البشـير عـبده طالب بطلـــة تـرحـام *** شـوفو كان لباس كـنتي دايــز قــــرب
ناس العيطة جميعهم عاشو لسقـام*** بوعزاوي و بيضاوي الصنهاحـي نغلــب
المجموعات ما لغيوان حتى للسهام*** تگـدة حصل صيادهم لغزالـة هـــرب
أصحاب الراي غير تـنـهاد و تخـمـام*** ميمون و خالد و زيد الرامي فـالـركـب
شيوخ الگصبة من ميسورحتى لصنام*** محمد بلخياطي شيخهم عيـى و تـعــب
رويشة غير بالوطار يغني عن لكـلام*** ما خماس ما حطـاب و لا جـاب حطـب
الحاج الثلالي نـار كالشمعـة فظــلام*** شيخ الملحون في قصته حكي لعجـب
في ذا المنـوال شيخكم نظم لنظـام*** معـناه واضح جـاي مصفـوف مـرتــب
عاشق الزين عـذروه كمجـاه مـنـام*** راه يغـيـر عليه من نسيـم المــغـــرب
يحسن عونـك يا للـي كسب لحمــام*** شحال قــدك تحظيه و شحـال تــزرب
حمام شرادي يطير و يخلي لرسـام*** حتى لـو كـان الدير له لقفـص ذهـــب
هـذا بحـر شحـال غـرق مـن عـوام*** عنتر جميل قيس وروميو في الغـــرب
مول العشق ما عمرو عاش فسـلام*** ديما صايم و الناس في أكل و مشـرب
النهــار يـدوز عليه ساعة مثل العـام*** طلــع حسابـك ياللــي باغـي تحســب
هذي قصة واقعة مهـوش كــــلام*** نعـيــدها لكــل مــن شـاف و جــرب
ما عندي حاجة في لمكذب واللــوام **** خـليه يهـدر و الفـارس سـرج و ركـب